وسىعان بايلانىستى, الاش جۇرتىنىڭ اسقاق ايبارىنا اينالعان ارۋ استانانىڭ 20 جىلدىق مەرەكەسىنە ارنالعان شارالار جىل بويى جالعاسۋدا. جاقىندا وسىنداي ءبىر شارا ەلورداداعى ورتالىق بالالار جانە جاسوسپىرىمدەر كىتاپحاناسىندا «اسقاقتاي بەر ەلىمنىڭ استاناسى» ايدارىمەن ءوتتى.
وقىرماندار كوپ جينالعان مەرەكەلىك شارانى ورتالىقتاندىرىلعان كىتاپحانالار جۇيەسىنىڭ ءبولىم مەڭگەرۋشىسى ساعىنىش سەيداحمەتوۆا اشىپ, جۇرگىزىپ وتىردى. باس قالامىزدىڭ وسىناۋ قالىپتاسۋ كەزەڭىندەگى ەلەۋلى جىلدار تۋرالى ەستەلىكتەردى ەسكە الا كەلىپ, وسى ءبىر شەجىرەلى وقيعالاردىڭ بەل ورتاسىندا جۇرگەن بۇگىنگى ارداگەر استانالىقتارعا ءسوز بەردى. العاشقى ءسوزدى كەزىندە استانا قالاسىنداعى حالقىمىزدىڭ ءبىرتۋار پەرزەنتى ساكەن سەيفۋلليننىڭ مۇراجايىن اشىپ, وسى ءبىر تاربيە ورتالىعىنىڭ ىرگەتاسىن قالاعان قۇرمەتتى زەينەتكەر روزا اسىلبەكوۆاعا الدى. روزا يمانعاليقىزى وسىدان 20 جىل بۇرىن العاش الاتاۋ باۋرايىنداعى الماتى قالاسىنان سارىارقا توسىندەگى اقمولاعا كوشىپ كەلگەن ەلوردامىزدىڭ ىرگەتاسىنىڭ قالانۋى, قالىپتاسۋى تۋرالى ءوزى كۋا بولعان وقيعالارمەن ءبولىستى. قازاق ارحيتەكتورلار وداعىنىڭ پرەزيدەنتى سەرىك رۇستەمبەكوۆ ءسانى مەن ساۋلەتى جاراسقان بۇگىنگى باس قالامىزدىڭ قايتالانباس ارحيتەكتۋراسىن قالىپتاستىرۋدا ەلباسىنىڭ ەرەكشە ەڭبەگىن اتاپ كورسەتىپ, ساۋلەت ونەرىنىڭ وزىق تۋىندىلارى بولىپ تابىلاتىن كەيبىر عيماراتتاردىڭ قۇرىلىسىن, سالىنۋ تاريحىن تىلگە تيەك ەتتى.
سونىمەن بىرگە, مازمۇندى باسقوسۋعا استانا بالەت تەاترى ديرەكتورىنىڭ ورىنباسارى دۇيسەن مۇسابەكوۆ, استانا وپەرا جانە بالەت تەاترى مۇراجايىنىڭ مەڭگەرۋشىسى ءافريزا قۇسايىنوۆا, «ەگەمەن قازاقستان» گازەتىنىڭ قىزمەتكەرى جىلقىباي جاعىپار ۇلى, «استانا اقشامى» گازەتى باس رەداكتورىنىڭ ءبىرىنشى ورىنباسارى عالىم قوجابەكوۆ, كەشەگى اقمولا, بۇگىنگى استاناداعى تالاي بۋىن جاس ونەرپازداردى تاربيەلەۋدە ەرەكشە ەڭبەك سىڭىرگەن مۋزىكا سالاسىنىڭ ارداگەرى, №1 مۋزىكا مەكتەبىنىڭ ۇلاعاتتى ۇستازى وسپان سۇلەيمەنوۆ قاتىسىپ, باس قالامىزدىڭ 20 جىلدىق دامۋ شەجىرەسىندەگى وزدەرى كۋا بولعان وقيعالار تۋرالى ەستەلىكتەرىمەن ءبولىستى. كەزدەسۋگە قاتىسقان ارداگەرلەر جاس وقىرماندار تاراپىنان قويىلعان سانسىز سۇراقتارعا مازمۇندى جاۋاپ بەردى.
استانا قالاسىنداعى ورتالىقتاندىرىلعان كىتاپحانالار جۇيەسىنە كىرەتىن ورتالىق بالالار جانە جاسوسپىرىمدەر كىتاپحاناسى جاس استانالىقتاردىڭ رۋحاني دۇنيەتانىمىن كەڭەيتەتىن ءىرى ورتالىقتاردىڭ ءبىرى. بۇگىندە بۇل كىتاپحانادا 162 مىڭنان استام كىتاپ قورى بار.وقىرماندار سانى 8 مىڭنان اسادى. ءوز ءىسىنىڭ مامانى جازيرا ەدىگەنوۆا باسقاراتىن بالالار كىتاپحاناسى جاس ۇرپاققا جان جاقتى تاربيە بەرىپ, ءبىلىم قازىناسىمەن سۋسىنداتۋدا ەرەكشە ەڭبەك ءسىڭىرىپ كەلەدى.
ءمادينا جالەلقىزى,
«ەگەمەن قازاقستان»
